١) العيال بيوسخوا البيت عادى تقبلي الفكره سبيهم يلعبوا و نضفي بالليل وبلاش كل شويه انتو مهملين وانا قرفت منكم
٢) المواعين ممكن تستنى لكن ولادك هيكبروا و مش هيستنوكي اقضي معاهم وقت لان اوقات كتير بيكونوا محتاجينك دلوقتي مش في الوقت اللي هتكوني فاضيه فيه وخلاص
٣) فكره ان الطفل التخين سليم و الرفيع عيان دي انتهت كفايه نفخ في العيال
٤) ابنك مش ابو تريكه انسوا الكره شويه و علموه رياضه مفيده " أحسن هييقى ألتراس في الاخر و هتلموه من الاقسام" في حاجات تانيه كتير خليه يجرب ويقرر هو
٥) عزيزي الاب مبروك عندك عيال يا ريت تتفضل معانا
٦) البنت زي الولد مش كماله عدد نظريه اكوي قميص اخوكِ خلصت من الخمسينات "يعتمد على نفسه"
٧) ابنك بيرد عليك عشان اول حاجه اتعلمها تف على عمو يا حبيبي "بديهي" علموهم( لو سمحت ومن فضلك وشكرا)
٨) نظام التعليم فاشل فابنك لو الاول فهو اول الفاشلين بلاش جو المعتقلات في المذكره بالهداوه " وبرده التعليم مش بس مدارس
١٠) ولادك احتمال يطلعوا لابوهم اللي هو اختيارك اصلاً فبلاش نعايرهم كل شويه انهم زيه وفِي تقوليلهم عيب اتكلموا مع بابا بأدب
١١) متضيعيش عمرك في خلطة الفراخ السريه الاطفال بتاكل اي حاجه لو كانوا سعداء و بيضحكوا
١٢) المدرسين بياكلوا عيش كلامهم مش قرآن انت بس الي هتعرفي ابنك فاهم و لا لا
١٣) في اماكن تانيه على الارض غير بيت امك و حماتك يا ريت العيال تشوفها
١٤) المشاعر اهم من الطبيخ و الشغل واللبس
١٥) صحيان الصبح متعب لكن انتي كمان بتكوني تعبانه فبلاش صويت في العيال هما مش سمعينك اصلاً
١٦) ولادك بيتكلموا و نوعهم انسان يعني عنده مخ و يقدر ياخد قرار اديله فرصته كفاية اعتماديه وعيش عيشة اهلك لا تهلك
١٧) الحواديت حاجه مفيده مش هيافه
١٨) ابنك هيفضل راجل لو اتعلم صح
١٩) الوجبات السريعه مضره و تؤدي الى الامراض "مش شياكه اطلاقاً"
٢٠) المفروض الاستحمام للاسترخاء انما دعك المواعين دا افترى
٢١) صوتك العالي دليل على ضعف موقفك وبجد متصوتيش
٢٢) الرسم مش تضيع وقت دا ابداع و الحيطه بتتغسل عادي جداً
٢٣) الهدوم قابله للغسل و اخترعوها عشان تتوسخ وتتغسل تاني بلاش عقاب وحرمان
٢٤ ) الهدوم للراحه مش للمنظره
٢٥) ابنك عنده وجهه نظر يا ريت نسأله عن رأيه واصبرى متصوتيش
٢٦) بلطجه ابنك مش مصدر للفخر اطلاقاً دي مصيبه
٢٧) ابنك مش زي ابن اختك و مش هيكون زيه
٢٨) ولادك ممكن يصاحبوا ناس غير ولاد اصحابك عادي و يعيشوا
٢٩) اصحاب ولادك مش سبب مشاكلك ،الانحراف استعداد، عالجي ابنك بدل ما نعلق فشلنا على الناس
٣٠) التربيه حوار و الحوار هو انك تتكلم و تسمع مش انك تكر كلام وبس
٣١) الاطفال بيقلدوا الي بيشوفوه مش اللي بيسمعوه
٣٢) اتفرج على الكرتون هتتصدم من اللي ولادك بيشوفوه اقعد معاهم و وجهم
٣٣) عزيزي الاب تعاطفك لوحده مش كفايه ولا فلوسك
٣٤) الاطفال مش مزعجه الاطفال مكبوته
٣٥) الخطف بقى ظاهره ركزوا مع اولادكم في كل خطوه
٣٦) الفرق بين طفل و التاني اهتمام واستيعاب
٣٧) ابنك مواليد القرن ٢١ و انت من ٢٠ في فرق قرن يا ريت ننسى تربيتك و نتطور بقى
٣٨) بلاش اساطير هعلقك و هطلع عينك خلي تهديدك واقعي
٣٩) النوم للراحه و الاحلام بلاش حفله تعذيب كل ليله ،شويه حواديت هتكون اظرف
٤٠) عزيزي الاب منور ملحوظه انت مش بس للشغل والقهوة
